تمثيل

كتير اوى بحس ان الحياة دى كلها
مسرحية كبيرة

و الناس هما الممثلين
منهم اللى بياخد ادوار البطولة
و منهم كومبارس
و منهم مبيعرفوش يمثلوا

و كله بيمثل على كله

و كل ما افتكر حاجه بجد
فى الاخر بيطلع تمثيل .. بس كويس

شوية المسرحية تقلب كوميديا
و يبقى ناقص صوت ضحك الجمهور

و شوية تقلب دراما
و ابدأ اعيط

و بعدين افتكر
ان ده كله تمثيل !!

كنت بحس انى لوحدى
وسط كل دول مبمثلش

بس شوية شوية اتعلمت
ازاى مبقاش انا
و افضل امثل على طول الخط
و بقيت بسمع تصقيف الناس

و فضلت امثل امثل من غير ماخد بالى

و يوم ما زهقت من التمثيل
ملقتش نفسى تانى
معرفتش ارجع انا

الكتاب اكوارثى الاول

احم احم
بدأ النهاردة معرض الكتاب
و نزل كتاب لطارق ..أخويا الكبير

.
الكتاب الكوارثى الاول
.

.
تليباثى
دار الؤلؤة
تجدونه فى..
سراى 4 الدور الارضى
او
جناح المانيا (أ)
تأليف طارق عميرة
.
اعتبروه اعلان غير مدفوع الاجر :D
يللا مبروك يا طارق و عقبال العدد التانى و التالت و كل ما كتبت اناملك

حالة غريبة

عارف لو .. ؟

لا معرفش

.. يبقى لسه

لسه ايه ؟؟

لسه كتير

؟؟؟؟؟؟

.. هتفهم اقصد ايه بعدين

My Photos

..كام صورة كده صورتهم امبارح

بضحك عشان بخاف عينيا يدمعوا

النهاردة ..
يوم غريب اوى

الصبح كنت عادى و مصدعه شوية
بس الحمد لله لقيت بانادول مع حد من اصحابى .. المشكله انه كان ازرق !!
يعنى بانادول العادى .. يعنى مش هيأثر فيا لان الاكسترا بينفع بالعافية اساسا!!
اخدت واحده .. و بعديها التانية
من ساعة ما اخدت تانى واحده و انا مش طبيعية ابدا
هيست تهييس مش ممكن ..
حتى شكيت هو اللى انا خدتو ده كان بانادول ولا حاجه شبهه
ضربت خالص ..
بقيت عامله زى السكرانين اى حاجه بضحك عليها و عقلى مش فيا و رايحة جاية بضحك لغاية ما اقع عالارض
او على راى واحده من صحاب كنت
!! Crunk
Crazy + Drunk
قعدت فى الحالة دى من الساعة 9 و نص الصبح لغاية الساعه 2
فترة طويلة اوى بالنسبة لتهييس زى ده
عالساعه 2 كده كنت خلاااااص مش قادرة وشى احمــــــــــــــــــر من كتر الضحك و كنت حاسة انى بولع
المهم بقى
انى وسط كل الضحك و التهييس ده
جيت مرة واحده
بطلت ضحك لثانية كده
و قلت : "انا متضايقة اوى!!" و بعدين كملت ضحك
و اصحابى قعدوا يضحكوا عليا على اساس انى كنت بهزر و مينفعش حد يبقى عامل كده و يقلك متضايق اوى
بس الفكرة انى دى كانت فعلا الحاجه الوحيده اللى قلتها بجد النهارده

انا متضايقة اوى

ماهو كل التهييس ده مش جاى من فراغ
انا مبلسعش كده غير لو انا فعلا متضايقة ..
اوى

تحت !

مش عارفه اقول ايه ..
لما تكون صورة مصر قدام الناس اللى هنا (فى قطر) هى سعد الصغير و بعرور..
لسه شايفه فيديو لسعد الصغير فى فرح من الافراح .. بجد مشفتش سفاله كده .. حاجه تقرف بجد
و المصيبة ان الناس عمالة تتفرج .. و مبسوطة
و لا الست اللى جنبه دى
دى لو كانت قلعت ملط و قعدت ساكته كان احسن
كنت لسه بقول مفيش تحت اكتر من كده
طالما فى ناس زى دول يبقى فى تحت كتير تانى
تحت كتير اوى

Butterflies

A shiver
and . .
Butterflies in my stomach !

سجن

أن تكون حبيسا

لسجن من النفاق

أنت صانعه

,,

انه الجحيم بعينه

رهبة

امبارح
اول يوم عيد

صحيت عادى الصبح او بالاصح قمت من السرير.. لانى منمتش اصلا و بدأت البس عشان ننزل لصلاة العيد
رحنا صلينا و الدنيا كانت تلج ..
رجعنا قععدت عالكمبيوتر شوية و بعدين بدأنا نحضر الاكل و كده
اكلنا و كله تمام .. بدأنا نتفرج على ماتش الاهلى و الزمالك .. و الحمد لله الاهلى كسب .. مش لانى اهلاوية اوى لكن عشان بابا وعدنا لو الاهلى كسب هننزل :p

لحد هنا كله تمام ..

لبسنا و نزلنا و رحنا على السيتى سنتر .. اكبر مول فى الدوحة ..
طلعنا عالسينما شفنا الافلام الموجوده
قررنا ندخل حفلة نص الليل
و كالعاده انقسمنا الى فريقينل
Deja Vu انا و بابا و اختى قررنا ندخل فيلم
Happy Feet بينما اختى الصغيرة و ماما قرروا يدخلوا

لحد هنا تمام

جبنا الفشار و البيبسى و كل واحد دخل على فيلمه
بعد حوالى ساعه من بداية الفيلم كده
فجأة بدأت كل الناس تخرج مع ان مفيش استراحة و اى كلام من ده
و لقيت بابا بيقللنا "فى حريقة .. خليكوا هنا"
جسمى كله قشعر و حسيت احساس غريب .. احساس بالرهبة ..
محستش انى خايفة اوى على قد ما حسيت نفسى باردة
قدام اختى اللى اول ما سمعت كلمة حريقة من هنا و بدأت تعيط
بابا نزل و انا مش عارفة اعمل ايه
انا قعدت اهدى فيها و هى بتقللى يللا ننزل

ماما و اختى الصغيرة خرجوا من الفيلم اللى كانوا فيه
و اتقابلنا بره ..
و اشتغل انذار الحريق
عربيات اسعاف و مطافى المكان كله اتقلب
و الناس كلها بتجرى عالباب
روحنا عالبيت مع وعد من بابا ان احنا هندخل نكمل الفيلم تانى

معرفش اول مرة يحصللى موقف كده
احاسيس كتيرة اوى
حسيت انى خايفه .. من ربنا
حسيت انى لازم افوق بقى و اعرف انا ليه بقيت كده

....
مش عارفة انا ليه بكتب البوست ده
بس حسيت انى محتاجة افضفض

2006 سنة الغم كله

ياااه .. اخيرا 2006 هتخلص

سنة نكد على جميع المستويات .. على المستوى الشخصى و على المستوى المصرى

على المستوى الشخصى

السنة كده اولها مش مظبوط .. فبوفاة جدتى (الله يرحمها) فى بدايات شهر فبراير خلتنى اعرف ان شكلها هتبقى سنة سووووودة

بعدها باربع شهور و قبل ما نفوق من صدمة وفاة جدتى .. نفاجأ بصدمة اخرى الا و هى وفاة عمى (رحمه الله)

قبل ما انا افوق من الصدمتين افاجأ بموضوع انتقالنا الى قطر .. يعنى اسيب كل اصحابى و قرايبى و حياتى و اجى اعيش فى بلد معرفش عنها حاجه ..

و فوق كل ده .. افوق على نهاية قصة حب مبدأتش اصلا

مش عارفه انا اللى نحس و لا السنة هى اللى فيها حاجه

نيجى بقى للمستوى المصرى

سنة الكوارث.. العبارة و القطارات و انفولنزا الطيور

احداث كتيرة اوى .. مظاهرات و اعتصامات و محاكمات

من اول تامر حسنى و احمد الفيشاوى مرورا ببنى مزار لغاية وائل الابراشى و ابراهيم عيسى

و موت الكثير من الشخصيات المهمة .. نجيب محفوظ ، هدى سلطان و غيرهم كتير

ده غير تحرشات وسط البلد و انتشار ثقافة الهشك بشك و العنب العنب

اللى بيحصل فى الجامعات و ميليشيا الاخوان و و و

لو عدينا المصايب مش هنخلص ..

نيجى للحجات الحلوة الوحيده اللى حصلت و اللى كلها كروية و الحمد لله

فوز مصر بكاس افريقيا

فوز الاهلى قدام الصفاقسى

حصول الاهلى على المركز التالت فى اليابان

مش عارفة هو فى تحت اكتر من كده هننزله و لا ايه .. انا شايفه ان احنا خلاص وصلنا للقاع و ميتهيئليش فى اوحش من اللى احنا فيه

يا رب تكون 2007 احسن من كده و منرجعش نقول ده 2006 كانت ارحم

!! حاجه اخيرة نسيت اقولهالكوا.. كل سنة و انتوا طيبين

تحت المطر

بدأت الامطار فى الهطول و بدأ الناس يسرعون الى بيوتهم هاربين . يالهؤلاء الناس! يدعون حب المطر و مع ذلك يفرون منه . لكنها كانت تختلف ، كات تعشق المطر بحق تعشقه بكل جوارحها، اخذت تتذكر كم من المرات حرمت من الخروج للعب تحته و هى صغيرة . آمنت دائما بأن الامطار هى دموع السماء التى تبكى على حال من فى الارض. كانت هناك .. مستلقيه على شاطئ البحرالذى كانت تعشقه ايضا ، فقد كان هو سلواها كلما حزنت التجئت اليه . كانت تؤمن ايضا بأن البحر دموع و لكن دموع العشاق الذين بكوا على شاطئيه لسنين. و لذلك فكان من الطبيعى ان تكون هناك فى ذلك الوقت .. تحت المطر و بجانب البحر .

افرغت رأسها من جميع الافكار و اخذت تهيم فى اللا شئ بدأت تغنى اغنية بلحن حزين لا تفقه من كلماتها شيئا و لكنها شعرت انها سمعتها من قبل. شعرت فى هذة اللحظات ان المطر يغسلها من همومها و احزانها و لدهشتها وجدت نفسها ايضا تذرف دموعا .. دموعا كتمتها كثيرا و ها هى قد رأت النور اخيرا .. دموع ماضى قديم و ذكريات بعيده .. كانت نفسها حبيسة الام الماضى ولكنها قد بدأت فى التحرر الان .. فا احد هنا تتظاهر امامه بانها قوية و غير مبالية .. لا احد، فقط البحر.

لم تعد تسمع شيئا سوى هدير الامواج و صوت الرياح، لم تعد تشعر بالوقت فلربما يكون قد مرت ساعات او دقائق معدودة هى لا تدرى . احست بدمعة اخيرة على وجنتيها ، ثم قامت و القت على البحر نظرة طويلة بعينين تبرقان .. بريقا لم تره من قبل . لقد شهد البحر ميلادها من جديد.

Doha 2006

The Games of Your Life

begins today ..

Titanaik 2

جاك رجع يا جدعان .. فى فيلم تيتانيك 2 اللى هينزل الصيف الجاى ..

انا اتجننت لما عرفت اخبر ده .. خصوصا انى بحب فيلم تيتانيك جدا .. مع ان الفيلم ملوش علاقة بسفينة تيتانيك اللى غرقت و كل ده .. لكن الفيلم مرتبط بالفيلم اللى قبليه بس من ناحية الشخصية الرئيسية "ليوناردو دى كابريو

يللا (زأططوا يا بنات) .. الفيلم بيحكى عن جاك بعد ما رجع و ازاى الدنيا اتغيرت من حواليه و انه لقى روز ماتت و كل حاجة مختلفة عن الوقت اللى كان عايش فيه ..

متخافوش محرقتش عليكوا حاجة كل ده موجود فى الاعلان بتاع الفيلم للاسف معرفتش احته عالبلوج .. لكن اللينك اهه

http://www.youtube.com/watch?v=Nva-KM_lu2I&feature=Views&page=1&t=t&f=b

..............................................................

تحديث : يا جماعة الاعلان طلع متفربك .. و الحوار كله طلع مقلب كبير .. اسفه على نشر الخبر ده .. معلش اعتبروها خطأ مطبعى .. و الله حاسة انى عبيطة اوى .. بس هى الحقيقة تتقال برضه الاعلان معمول حلو جدا .. و لو ان البوستر مش قد كده .. تقبلوا اعتذارى

My Lyrics Blog

تم بحمد الله افتتاح ماى نيو بلوج اغانى .. بس مزااااج و هو بلوج هكتب فيه كلمات الاغانى اللى بحبها و اللى هتبقى ماشية على مزاجى ساعتها .. اتمنى يعجبكوا البلوج الجديد

تحياتى

شئ من حرية

متأكدة انك مش نازلة ؟؟

آه مش نازلة

يا بنتى الجو حلو اوى و مضمنش هنعمل ايه بعدها

خلاص بقى قلت مش عايزة انزل

ماهو الفكرة ان مفيش حتى نت .. هتعملى ايه ؟؟

(فى حاجات كتير غير النت تتعمل (بالذات لو انا لوحدى .. متفهمونيش غلط

!!براحتك

........................

!!ياااه اخيرا لوحدى

اسارع بفتح الشبابيك .. اتنسم نسيم الحرية (حلوة اتنسم دى) اقلب من الجزيرة و اجيب قناة ميلودى ..انا مش بحب اتفرج عالاغانى بس واجب برضه اطمن على احوال المغنيين و المغنيات و اشوف ايه الجديد .. و مين انضم اللقائمة السوداء و مين لسه محترم نفسه.. شوية عقبال ما ييجى الفيلم الرومانسى اللى انا مستنياه .. الاقى كل الاغانى وسخة ..بستثناء حاجات قليلة .. اقلب لغاية ما اشوف كارول سماحة فى اخر فيديو كليب .. اتفقع .. هى دى كارول اللى كنت بحب اسمعها .. اسيب التلفزيون خالص اقوم احضر ماج كابتشينو .. عقبال ما الفيلم ييجى .. ماهو الفرجة روقان برضه .. ياااه لسه فى وقت .. اطل عالنت الاقيه اشتغل .. لأ ده يوم حظى بقى .. افتح اللاب توب و اكتب البوست ده فى انتظار الفيلم .. ايه ده شكل الكابتشينو برد .. يللا مش خسارة فيكو .. سلام بقى لحسن الفيلم شكله بدأ

Closedو ال Openلافتة قلبى بين ال

عذرا القلب الذى تحاول الوصول اليه مغلق حاليا للتصليحات .. يرجى المحاولة فيما بعد

..
؟؟؟Open & Closed قعدت افكر ليه قلبى متمشيش عليه القاعدة بتاعة

ليه دايما قلبى و هومقفول بيصر بعد الناس على دخوله ؟ لا و مقدرش اخرجهم منه
..

ممكن يكون قلبى
Closed
و غير مسموح لأى حد بالدخول ساعتها .. الا اللى يقدر بقى .. و ساعات يكون
Open
و تحرر خلاص من ذكريات ماضى اليمة و تجارب حب فاشلة
..
ده لو الموضوع كله
.. Automatic على مزاجى.. اكن اكتشفت ان الموضوع Manual
بيتغير ذاتيا من غير تدخل منى مهما حاولت .. ساعات يفتح و ساعات يقفل من غير مواعيد و لا تنبيهات ..

عالعموم لو بايدى الموضوع بايدى يبقى ساعتها اليافطة
!! نظرا للترميمات Closed هخليها

No Physical Touching!

عمرى ما كنت اتوقع انى أدخل مدرسة فى حياتى تكون دى قوانينها

ممنوع لمس اى طالبة للاخرى و لو للسلام سلموا ن بعيد لبعيد ..ممنوع السلام على اى مدرسة .. ممنوع السلام بين المدرسات ..
اللى هتخالف القوانين دى هيتعملها محضر فى القسم و هيتم استدعاء اولياء امورها .. خلى كل بنت فى حالها و خلوا السلامات بره المدرسة ..

!!!

المكان : مدرسة ثانوية بنات

هنا مش بعيد تلاقى كاميرات فى الحمامات و فى باقى المدرسة .حصلت فى مدارس تانية... مناظر غريبة و بنات مسترجلة و قصات شعر ممنوعة .. هنا ممكن تلاقى كل اعراض الحب من عدم نوم وعدم اكل .. الخ بس المصيبة انه من بنت لبنت


..

!!!

اجمع الجميع انى لما اسيب مصر و اجى هنا (قطر) هكتسب خبرات كتير بس عمرى ما كنت اتوقع ان الخبرات دى تكون كده .. انا حاسة انى جاية من عالم انى او مش فى الدنيا مثلا .. الواحدة هنا بتخاف من اى لمسة او حركة و لو من زميلتها فى المدرسة .. ايوة قبل ما اجى كنت عارفة ان فى شذوذ بس مش كده ..او على رأيهم "سوالف الاعجاب". هنا لقيت نفس الكلام اللى بيتقلنا فى مصر مع اختلاف بسيط .. انتو فى فترة مراهقة .. عب لما يطلع منك تصرف زى ده عيب يا بنات .. طبيعى جدا يكون فى اعجاب ببنت تانية بس الرسايل و القلوب و الحجات دى عيب..و طبعا ما يليها من تصرفات غير لائقة هنا اى تصرف ممكن بتفهم غلط فخلوا بالكوا يا بنات

!!

اهه دى الحاجة الوحيدة اللى مظبوطة فى مصر.. و ان كنت مش عارفة ايه انيل من التانى .. اللى انا فيه هنا ولا اللى حصل فى وسط البلد ..

!!!!!

ملك و كتابة

دايما زمان لما كنا بنعمل قرعة او ازهق فالعب مع صحابى بالقروش دايما كان السؤال الازلى بيتكرر .. ملك ولا كتابة ؟؟

مش عارفة ليه دايما كنت بختار كتابة .. يمكن زمان و انا عندى بتاع 8 سنين كنت بقول كتابة لسبب وجيه و هو انى كنت شايفه ان العلم نور و كنت بحب القراية جدا جدا .. شوية بشوية و انا بتاع 11 سنة كده ..كنت بختار برضه كتابة لان فى رأيى ان الواحد يبقى عالم احسن من انه يكون ملك .. و بعدها بكام سنة حتى الان و انا برضه بختار كتابة لسبب وجيه جدا ان الملك ده اتجسدلى فى صورة الحاكم .. اللى هو مبارك طبعا .. و الكتابة بقت كل قولة لأ و بقت صوت المعارضة ..و سبحان الله كنت فى اى قرعة بكسب .. و يوم ما يختار اللى قدامى كتابة و ابقى متضرية انى ابقى الملك بخسر و طبعا مش كل مرة كده بس معظم المرات

اللى فكرنى بالموضوع ده انى بالصدفة سمعت الاغنية بتاعة فيلم ملك و كتابة .. كلماتها بتقول ابقى ملك متكونش كتابة .. بس انا بقول ابقى

!كتابة .. متكونش ابدا ملك

sratgne ha?

fi yuo cna raed tihs, yuo hvae a sgtrane mnid too Cna yuo raed tihs? Olny 55% of plepoe can.i cdnuolt blveiee taht I cluod aulacltyuesdnatnrd waht I was rdanieg.The phaonmneal pweor of the hmuan mnid, aoccdrnig to a rscheearch at Cmabrigde Uinervtisy, it dseno't mtaetr in waht oerdr the ltteres in a wrod are, the olny iproamtnt tihng is taht the frsit and lsat ltteer be in the rghit pclae. The rset can be a taotl mses and you can sitll raed it whotuit a pboerlm. Tihs is bcuseae the huamn mnid deos not raed ervey lteter by istlef, but the wrod as a wlohe. Azanmig huh? yaeh and I awlyas tghuhot slpeling was ipmorantt! .
its ncie to be one of taht 55%. lol

وصمة عار

وصمـــــــــــــــــــــة عـــــــــــــــــــــــــــــار

خبر ازعج كل بيت وكل دار

كلنا سمعنا عن حالة السعار

اللى بتعكس لينا حالة الانهيار

.

مهما اكتب مش كفايه

مهما اوصف الحكايه

صعب يعبر كلامى

عن مدى حزنى والامى

.

ثورة جامحه للجياع

بينعكس فيها الضياع

والانحادر ف القيم

وصرح تقاليدنا انهدم

.

صعب يوصف قلمى حالى

صدمه هزت كل كيانى

ازاى وصل تفكير شبابنا

ان يتحرش باخته

فين غيرة الرجال

وحفظه لشرفه وعرضه

.

احنا عايشين جوا غابه ولا ايـــــــــــــــه

القوى عايش براحته

والضعيف نقضى عليه

.

البنات اللى بيبكوا

واللى خايفين من مصيرهم

ليكونوا زى غيرهم

قولولى ذنبهم ايه

.

ايوه كل بنت خايفه

لتقع فريسه ليهم

ايوه لازم لينا وقفه

وباروحنا لازم نحميهم

.

ايوه لازم نخطى خطوط النار

ونعرف ايه سبب الانهيار

لو سكتنا..يبقى مصيرنا الدمار

.

اللى حصل فى حقــّــنا

ده وصمة عــــــــــار

ثورة الهياج اللى قامت

قامت من همج ضمايرهم ماتت

.

واى راجل حر و شهم

النار ف عروقه قادت

ومستحيل بعد اللى شافه

هيفضل فى كهفه ساكت

.

طعنة جهل غرزت فينا

وقسمت ظهر قيامنا العليا

دينـّـــا واحده يا ناس يكفينا

نرجع ليه بقلوبنا الطاهره

ويا رب يا عالم تهدينا

وتنور بصايرنا العتمه

.

لازم وقفه قويه بجد

اللى حصل كارثه ودمار

صر قيامنا خلاص اتهد

وبايدنا نصحح افكار

كفايه بقى عن دينـّــــــــا بعد

لازم يرجع لينا نهار

.

عار عار عار

اللى حصل ده وصمة عـــــار

.

.

الشعر ده اخدته من مدونة مفلس افندى الرايق

فى تعبير له عن احدث وسط البلد ..