Jan 10, 2007

بضحك عشان بخاف عينيا يدمعوا



النهاردة ..
يوم غريب اوى

الصبح كنت عادى و مصدعه شوية
بس الحمد لله لقيت بانادول مع حد من اصحابى .. المشكله انه كان ازرق !!
يعنى بانادول العادى .. يعنى مش هيأثر فيا لان الاكسترا بينفع بالعافية اساسا!!
اخدت واحده .. و بعديها التانية
من ساعة ما اخدت تانى واحده و انا مش طبيعية ابدا
هيست تهييس مش ممكن ..
حتى شكيت هو اللى انا خدتو ده كان بانادول ولا حاجه شبهه
ضربت خالص ..
بقيت عامله زى السكرانين اى حاجه بضحك عليها و عقلى مش فيا و رايحة جاية بضحك لغاية ما اقع عالارض
او على راى واحده من صحاب كنت
!! Crunk
Crazy + Drunk
قعدت فى الحالة دى من الساعة 9 و نص الصبح لغاية الساعه 2
فترة طويلة اوى بالنسبة لتهييس زى ده
عالساعه 2 كده كنت خلاااااص مش قادرة وشى احمــــــــــــــــــر من كتر الضحك و كنت حاسة انى بولع
المهم بقى
انى وسط كل الضحك و التهييس ده
جيت مرة واحده
بطلت ضحك لثانية كده
و قلت : "انا متضايقة اوى!!" و بعدين كملت ضحك
و اصحابى قعدوا يضحكوا عليا على اساس انى كنت بهزر و مينفعش حد يبقى عامل كده و يقلك متضايق اوى
بس الفكرة انى دى كانت فعلا الحاجه الوحيده اللى قلتها بجد النهارده

انا متضايقة اوى

ماهو كل التهييس ده مش جاى من فراغ
انا مبلسعش كده غير لو انا فعلا متضايقة ..
اوى

11 comments:

dead man said...

عارفة أنا لسه من شوية كنت بكلم حد غالي عليا وبقوله أنا مبسوك وعمال أهزر واضحك ومرة واحدة قولت "عارف أنا مش مبسوط" كده فجأة..

يلا محدش واخد منها حاجة..

اتمنى انك تبقى كويسة

bagabigo said...

اصعب حاجة فى الدنيا انك تكونى متضايقة و محدش يصدقك او انك تكونى متضايقة و تضحكى ربنا يسعدك و يقك ضيقك

tamer afify said...

جميل انك تخرجي طاقتك في الضحك حتى لو طاقة حزينة مكبوتة جواكي
يارب تكوني في أحسن حال دلوقتي
تحياتي

3rby said...

عادي
علي فكرة يااما انتي فعلا عندك اكتئاب مش مدايقة بس ياما ده مش بانادول
النهارده في درس الانكليزي ماكنتش عارف انطق
as if it's
كنت باقول
as it ifs
a itt itts

aw2atyadonya said...

ربنا يفك كربك
بس عارفة
الكتابة بالعربى اجمل بكتير اوى

emz said...

dead man

كلنا فى الهوا سوا

bagabigo

ربنا يخليكى
متهيئلى انا كويسة دلوقتى


tamer afify

معرفش اذا كانت دى طاقة حزن بتخرج ولا بس بضحك عشان ادارى اللى جوا

3rby

ههههههههه
موضوع مكتئبة ده عارفينه من زمان
بس مكنتش اعرف ان الضحك من اعراضه

aw2at ya donya

شكرا و ان شاء الله المدونة تعجبك
و متهيئلى ان معظم كتابتى بالعربى :S

Unknown said...

أنا عارفه الحاله دي , لما تضحك أوي عشانك مش مبسوط, ماهو أحيانا دموعنا ممكن تجرحنا فنعمل ايه نضحك وخلاص, هو مش فيه هم يضحك وهم يبكي , يبقي نضحك أحسن.

sofinqoraso said...

ساعات كتير بنعمل اى حاجة عشان نهرب من الحالة اللى أحنا فيها
المشكلة أننا بنلف نلف ونرجع لنفس الحالة
ومهما خبينا مش هنعرف نخبى على نفسنا

warDaya said...

يااااااااااه...انا تقريبا لما ببقى متدايقه اوي ببقى كده على طول..
وبيحصل نفس السيناريو ده..
ابقى ميته من الضحك لوقت طويل..لدرجة ان عنيا تدمع وبطني توجعني..وفجأه..
ماقدرش احتمل احساس الالم والمراره اللي جوايا متشبع بيهم رغم الضحك اللي انا فيه..
بالظبط..اروح ساكته فجأه واقول...انا متدايقه اوي..
انا زعلانه اوي..
انا بجد..جوايا تعبانه اوي..

----
ساعات اقول بلاش اقول اني تعبانه او متدايقه..خليني اضحك واعيش عادي حتى لو كان جوايا غير كده..
قعدت مع واحده صاحبتي عزيزه عليا اوي..وقعدنا نضحك ونهرج(كالطبيعي بتاعنا)وف الاخر بصتلي اوي وسألتني..انتي كويسه؟..
ابتسمت..قولتلها اه..زي مانتي شايفه..
قالتلي في حاجات مش بتتشاف بالعين المجرده..
-------
انا رغاية وبايخه اوي..عارفه:$..
بس فكرتيني بنفسي جامد..وجيتي على الجرح..
عارفه؟..بحس انها من رحمة ربنا انك تمري بحاله زي دي..
الله اعلم لو فضلتي مركزه مع المك..ايه اللي ممكن يحصل..
فعلا..الحمدلله على كل حال..
ربنا يوفقك يارب :)

koukawy said...

ياااااااااااااااااااااااااه
بيبقي حاجه صعبه اوي لما الواحد يضحك من بره و هو من جوه كئيب00انا بحس ان الضحك بيوجعني

emz said...

sofinqoraso

عندك حق
المشكلة ان احنا مهما خبينا مش هنعرف نخبى على نفسنا
مكانش حد غلب

wardaya

بجد ربنا يخليكى لصحبتك
ان حد يلاقى انسان فاهمه كده مش سهلة

منورة البلوج و مش بايخه ولا حاجه
:)

koukawy

و هو بيوجع بعقل