Dec 19, 2007

عيد س عيد :)



كل سنة و انتوا طيبين و كويسين و مبسوطين و بتضحكوا :)



Dec 6, 2007

تاج متفائل :)



Example
تاج جديد مررتهولى من هنودة .. عاشقة اسكندرية
و قلت ابقى ارد عليه طالما قالوا بيظبط الموود
**

بتفاءل لما ..
اشوف حد ماشى مبتسم فى الشارع مع ان كل الناس مبوزة

بتفاءل لما ..
اسمع منير او داليدا عالصبح و احس بروح مصر عايشة معايا

بتفاءل لما ..
اشوف طفل بيضحك من قلبه من غير ما يشيل هم اى حاجه فى الدنيا

بتفاءل لما ..
الدنيا تمطر و احس بالهوا الساقع بيلمسنى

بتفاءل لما ..
اقرى بوست عند حد معرفوش و الاقيه بيوصف مشاعرى بالمللى و احس انى مش لوحدى

بتفاءل لما ..
احس بطعم الشوكولاته بيدفينى

بتفاءل لما ..
الاقى ناس كتير اوى بيحبونى بجد و انا مش واخده بالى

بتفاءل لما ..
ارجع فى الصيف للملجأ اللى كنت بروحه و الاقيهم كلهم كبروا بس لسه فاكرينى غادة و سمية و مريم .. وحشتونى مووت بجد !

بتفاءل لما ..
الاقى كل الناس بتبعد الا هى لسه واقفه جنبى

بتفاءل لما ..
معاد نزولى لمصر يقرب

بتفاءل لما ..
احس ان ربنا قريب منى رغم كل اللى بعمله

بتفاءل لما ..
يوصللى تاج جديد :)

.....

مش هدبس حد فى التاج بس اى يحب يرد عليه .. يبقى يرد براحته

Dec 1, 2007

!! نهاية لعبة

يوم الخميس اللى فات و احنا فى مدرستى الكريمة لقيتهم بيجرجرونا على قاعة المحاضارات .. طبعا رحت و انا مبسوطة جدا عشان حصص الفيزيا و العربى هيضيعوا .. لكن مكنتش اعرف ان دمى هيتحرق كده ..
المهم اللى هتدينا المحاضرة واحده اسمها بدرية معرفش ايه .. ما علينا ..
بدأت المحاضرة اللى اسمها نهاية لعبة !
اللعبة دى اللى هى الموبايل و محدش يسألنى ايه العلاقة ..

الست ركزت على أربع نقط رئيسية ..
أولا :
حرام الواحده تتصور بالموبايل بتاعها عشان كل الصور بتتسجل على الذاكرة الاحتياطية و بعد ما الموبايل ده بيتباع الشباب اللى هما الشياطين و الذئاب البشرية بيشتروا الموبايلات دى اول ما يعرفوا انها بتاعة بنات و يتفرجوا عالصور و بعدين يركبوها على اجسام تانية ..
حاولت الاقى للست اى عذر قلت يمكن قصدها على الفون ميمورى و الميمورى كارد فلو اتمسحت الصور من واحده بتفضل فى التانية .. بنت قامت قالتلها ما تعمل فورمات للموبايل فاذا بها بتقللها لا .. الصور دى مهما مسحتيها بتفضل عالموبايل مبتتمسحش ابدا !

ثانيا
حرام الواحده تخرج مش مغطية وشها لان كده اى حد ممكن يصورها و الصور دى بعد كده تتبعت بالبلوتوث او تتحط عالنت و البنت تتفضح !

ثالثا
حرام اى واحده تروح فرح و تلبس فستان سواريه و تتزين عشان ممكن تتصور هناك و الصور دى تنتشر برضه! (مع العلم ان هنا كل الناس بتتفتش قبل ما تدخل اى فرح و كل الموبايلات و الكاميرات بتتاخد )

رابعا
الكفار اللى اخترعوا الموبايلات دى كانوا مخليين مساحة الفيديو بتصور لغاية دقيقة .. و بعدها وصلت لتلات دقايق .. و بعدها وصلت لساعة ..
ليه بقه ؟؟
عشان الكفار اول ما عرفوا ان المسلمين بيستخدموا الفيديو ده فى اشاعة الفتنة قاموا زودوه لساعة !!!

ده غير طبعا شوية قصص الفضايح اللى اتقالوا ما بين الكلام ، و معرفش مين اتطلقت و مين انتحرت بسبب صورة ما و بتاع ايه .. ممكن شوية من القصص دى تكون صح بس ابدا متتقالش فى السياق ده ..
و فى النهاية استتروا يا بنات يا حبيبات جلبى استتروا استتروا .