Feb 20, 2007

مش عايزة

انا مش بحب مصر بس بكره قطر
انا مش بكره قطر بس بحب مصر

انا مش عارفه انا حالتى ايه من الجملتين دول
لكن ايا كانت
مش عايزة لما اعد هنا كتير
ارجع مصر و انا مبحبش قطر و بكره مصر !!

مش عايزة ارجع و انا زى بابا .
بكتب البوست ده و انا فى اجازة اسبوعين مقضياهم فى مصر
سلام

Feb 14, 2007

Feb 13, 2007

هرتلة

مش عارفة هكتب عن ايه
عندى كلام كتير عايزة اقوله
مخنوقة اوى اليومين دول و مش عارفه ليه .. من غير سبب ؟ لا اكيد فى سبب بس انا لسه مش عارفاه
حاسه انى متضايقه جدا رغم انى بكرة هركب الطيارة و هنزل على مصر و انا بقالى اكتر من 6 شهور مستننيه اليوم ده
مش عارفة فيا ايه
بسمع اغنية معينة مرة ورا مرة ورا مرة طول اليوم و مبغيرهاش مع انى مش حاسه بكلامها اصلا
معظم اللى حواليا شايفين ان انا انسانة متناقضه و متقلبة
انا دلوقتى اقتنعت بالكلام ده جدا

فى لحظة مخنوقه و مش طايقه حد و بعدها بثوانى فرحانه
و كله من غير سبب
مليش نفس اعمل حاجه
حاسه ان حياتى كلها فلاشات باك .. كل ما حاجه تحصل افتكر موقف مشابه مع ناس تانية زمان

Dunno whats wrong with me..



Feb 7, 2007

كلنا بنحبك يا حمار

جالى الفيديو ده عالايميل و قلت لازم احطه هنا
فاكرين الست دى
ايوة .. هى بتاعة مفيش حاجه..

بس المرة دى بتتكلم عن الحمار
يا ترى مين ؟؟



Tagged

..تاج و تاج و اتجمعوا التيجان
فجأة لقيت مبعوتلى تلاتة تاج مرة واحده
..
اتنين من عند شاب فقرى
و واحد من عند وئام
..
المهم انا هرد على اتنين عشان التالت مش عاجبنى:P
..نبدأ بتاج المثقفين
افتح الكتاب اللي بتقراه حاليا علي صفحة 123 و عد خمس سطور و اكتب اول تلاتة بعدهم.. ايه العقد دى
.................................................
.
وصل النبيذ خلال 30 ثانية ، ملأت كأسينا
" و هى ماذا تفعل ؟"
" أتود فعلا أن تعرف؟ "
أزعجنى أن أتلقى سؤالا للإجابة عن سؤالى.
................................................
الزهير - باولو كويلو
.مش حلو اوى زى ساحر الصحراء و ممل حبتين و بقالى فترة بقرا فيه بس لسه مكملتوش
..
نيجى بقى للتدبيسة الكبيرة
التاج التانى
..
اللى هيحصل لايميلك بعد ما تموت؟
هيحصله ايه يعنى .. هيتقفل بعد فترة
..
اديت الباسوورد لحد قبل كده؟
.. يس
..
لو اه كانت طبيعة علاقتك بيه اية؟
صاحبتى الانتيم
..
إسمك؟
ايثار
..
اسم الدلع المشهور وسط اصحابك؟
eith - emmy - emz
..
عمرك؟
مش كتير
..
البرج؟
الجوزاء
..
مجال دراستك؟
ثانوية عامة .. بعيد عنكوا
..
شخصيتك نوعها ايه؟
و الله اللى يجاوب عالسؤال ده الناس اللى تعرفنى ..
..
السفر بالنسبة لك؟
عادى .. على حسب المكان
..
المود بتاعك؟
مخنووووقه
..
وقت فراغك بتعمل فى ايه؟
مفيش غير اتنين
نت و نووووووووم
..
الاكلة المفضلة؟
French Fries
نودلز
نوتيلا
بيتزا
..
اكثر 6 حاجات بتكرهها؟
قطر
شغل البيت
اللحمة الضانى
الكدب
الخيانة
الصداااع
..
اكثر 6 حاجات بتحبها؟
النوم
النت
جرنان الدستور
المطرة
البحر
اللى يعملك حاجه و مش مستنى كلمة شكرا
..
الشغل بالنسبة لك؟
مذاكرة
..
الانترنت والكمبيوتر بالنسبة لك؟
حياتى التانية
..
..
امرر التاجين دول

Feb 6, 2007

وحشتينى


كم كنت غبية
ادرك الآن كم كنت غبية

رأيتك مرة اخيرة
هناك فى العناية المركزة
ثم رفضت الذهاب ثانية
لم أرد ان اراك طريحة فراش المرض
لم أعرف انك كنت تودعيننا آنذاك

........................

وحشتينى
واحشنى كل يوم جمعه كنت بشوفك فيه
واحشنى كحك العيد اللى كنتى لازم تعميليه بايدك


"كان نفسى أشوفك عروسة"
آخر حاجه قلتيهالى..
..............................
...................
.....
رحمك الله
و أسكنك فسيح جناته
فى ذكرى وفاتك .. جدتى