يمكن ناسى

يمكن ناسى لأنك فيها.. مش وحشاك و لا غبت عليها

هى الاولى

"لو كانت ذكرياتي سعيدة ما كتبتها.. إن ذكرياتي التعيسة هي الأولى"

توفيق الحكيم

فلاش باك

(1)

يونيو 2004

"بس قطر فعلا بلد حلوة .. هادية و نضيفة
الواحد هيرتاح اوى لو عاش هناك ."

(2)

مارس 2006

"ايثار .. فى شغل معروض عليا فى قطر و لسه مش عارفه الامور هتمشى ازاى .. بس حبيت اقلك."
( عادى يعنى .. ياما اتعرض على ماما شغل بره)

(3)

بعدها بكام يوم

الو .. ياسمين ..
مالك يا بنتى فى ايه .. بتعيطى ليه؟
ماما معروض عليها شغل فى قطر و احتمال نسافر !
تسافرى ؟!!!
لا لا .. تسافرى ده ايه ؟ مينفعش .. اكيد مش هتسافرى .. ده اكيد كلام كده بس .
يا بنتى بقللك هيعملوا معاها انترفيو و الموضوع شكله ماشى .
لا لا .. مانتى ياما اتعرض على مامتك شغل بره يعنى .
ياسمين صدقينى انا حاسه ان الموضوع ماشى كويس ..
خلاص اهدى انتى بس و بطلى عياط .. انا قلبى بيقللى مش هتسافرى .


(4)

ابريل 2006

"فى شغل معروض على ماما يا بنات فى قطر .. لسه مبانش حاجه بس الدنيا شكلها ماشية كويس و احتمال نروح نعيش هناك."
..
طيب ماشى !

(5)

نفس اليوم بالليل

ايثار مالك ؟ عينيكى حمرا اوى .. انتى كنتى بتعيطى ؟؟؟
لا مفيش .. معرفش واجعانى بقالها شوية بس ..
فى حاجه ؟ شكلك كنتى بتعيطى ..
مفيش و الله .. هعيط ليه بس هو فى حاجه اعيط عليها؟
طيب .. تعالى احطلك قطرة !

(6)

مايو 2006

غريبة الولاد خدوا الموضوع ببرود اوى !

(7)

اغسطس 2006

ادخل غرفتى الجديدة .. اجدها خالية الا من سرير وحيد
ينتظرنى فنكون وحيدين معا !
املأ الجدران بصور .. كنا فيها معا ..
لماذا ؟ لا ادرى .. و كأننى من الممكن ان انسى يوما !

(8)

سبتمبر 2006

قسماً .. قسماً
قسماً بمن رفع السماء
قسماً بمن نشر الضياء
قطر ستبقى حرةً
تسمو بروح الاوفياء
..
وجوه غير الوجوه
و عالم غير العالم
ادخله فجأة !

(9)

رمضان 1427 هــ

لم اشعر به مطلقا .. لم ار فوانيساً معلقة هنا و هناك
لم افطر اول يوم عند جدتى و لم اصلى التروايح فى النادى كعادتى كل عام ..
باختصار لم يكن رمضانا بالنسبة الى !

(10)

ديسمبر 2206

نجلس معا لنشاهد افتتاح الالعاب الاولمبية الاسيوية .. يهتف ابى ساخرا : " طبعا مصر هى اللى عاملالهم الشغل الجبار ده"
انظر اليه صامتة .

(11)

فبراير 2007

انزل الى مصر فى اجازة اسبوعين .. اجد كل شئ كما هو لم يتغير .. فيما عدا عدم بقائى جزءاً منه .. مضى الجميع فى حياتهم و كأنى لم اكن بها يوما .. نفس السيناريو الذى توقعته .

(12)

ابريل 2007

"وحدتنا هذا الفصل عن الحضارات المصرية القديمة ."
ينظر الى الجميع باعتبار اننى المصرية الوحيده فى الصف ، بينما تقلب زميلتى فى الكتاب و تقول : " اكبر وحدة فى المنهج ! ماشالله عليكم "
اقول ساخرة : " طبعا مش زى تاريخ قطر . الا هو ايه تاريخ قطر اساسا ؟!"
ترد على باسمة : " حفرنا فى الارض لجينا شى اسود .. صرنا اغنياء !"
افكر واجمة .. شئ اسود جاء بى الى هنا فى يوم اسود منه بالطبع .